المستهل
ـــــــــــــــــ
كل يـــوم أگولن بي تمر * واطفي ناري
مرت علينه أسنين * ما يهده دمع العين لتخلي عيني التنتظر * مدمعها جـــاري
**************************
( 1 )
أخافن عمري من يخلص .. أموت وعيني متشوفك
وأنه المنتظر دهري .. أعله راسي أتمسد أچفوفك
يشوفونك بعيد الناس .. وأشوفن روحــي بجروفك
يــا أكبر أمــل بالكــــــون .. يمته إتجمع أصفــوفك
يا منقذ الأمة ألك * مشتاگة روحي
راية محمد ترتفع * وتلم جــروحي
مرت علينه إسنين * ما يهده دمع العين لتخلي عيني التنتظر * مدمعها جاري
( 2 )
صرت مثل النهر لو جف .. شروي والگلب ضامي
مثل شجرة بمهب الريح .. تطيح أغصاني جدامـــي
شيصبر گلبي وجــــــروحه .. تهيج من أذكر آلامي
صــــــــدگ تتحقق أحلامي .. وأشوفك حاضر أيامي
محتاجه گبل الموت ألك * روحي الحزينه
وتخضر أهــــروش الگلب * جيتك علينه
مرت علينه إسنين * ما يهده دمع العين لتخلي عيني التنتظر * مدمعها جاري
( 3 )
علينه أتكالبوا مولاي .. طغاة العالم بــــــــأسره
شيل الراية وأخذ السيف .. وأول موقف أتذكره
ضلع أم الحسن وحسين .. ذيچ الطاهرة ألزهره
ورد لمسجد الكوفة .. وأنظر ســــــــاعة الطبره
دين الله حــــــــاير ينتظر * عجل ظهورك
هالطلعة تشفي چم گلب * ساعة حضورك
مرت علينه إسنين * ما يهده دمع العين لتخلي عيني التنتظر * مدمعها جاري
( 4 )
أخبرك عن طفوف حسين .. صورة لگلبك أتكسره
مــــن بعد الذبح بالخيل .. رضـــــوا للسبط صدره
ورضيع بلا ذنب ويــــاه .. تخضب من دمه نحره
بعد يم الشريعة أتشوف .. گمر طايح على الغبرة
دم الرضيع بكربله * شيطفي نـــــاره
مشبوحه عينه وتنتظر * تاخذله ثاره
مرت علينه إسنين * ما يهده دمع العين لتخلي عيني التنتظر * مدمعها جاري
( 5 )
عشت عمري بألم وأحزان .. تناطر طلعتك عيني
مابين الدمـــع والنوح .. مصايب خلصت أسنيني
المذاهب كلهه بيه أتلـــوم .. تريد أتخله عن ديني
أريــــــدك سيدي بها ليوم .. علومك بيهه ترويني
مذهبنه كـــــــــون بطلعتك * بيدك تلمه
كل شيعي گلبه المنجرح * تكشفله همه
مرت علينه إسنين * ما يهده دمع العين لتخلي عيني التنتظر * مدمعها جاري
( 6 )
خلص عمري أنتظر مولاي .. نار بروحي تچويهه
علامــــات الظهور أشكال .. نحسب كل وكت بيهه
شنهو الظل بعد ما صـــار .. وين ألگه أنه تاليهه
ظهورك يا هو اليشوفه .. روحي لشخصك أفديهه
يالغايب أنته لكل محب * شمعة حياته
بعيونه وإيضمك ضخر * ساعة مماته
مرت علينه إسنين * ما يهده دمع العين لتخلي عيني التنتظر * مدمعها جاري